У гэтым артыкуле вы знойдзеце агульныя рэкамендацыі па афармленні ў школу за мяжой. Кароткія звесткі і карысныя спасылкі, якія дапамогуць знайсці для вашага дзіцяці адпаведную ўстанову адукацыі ў Літве, Польшчы, Германіі і Грузіі, сабраны ў асобным матэрыяле, спасылка на які даецца ў канцы артыкула.
Крок 1. Не марудзіць з залічэннем
Ува ўсіх еўрапейскіх краінах школьная адукацыя абавязковая. Як толькі дзіця атрымае пасведчанне на права жыхарства (будзе зарэгістраванае па пэўным адрасе), яна (ён) павінна(ен) пачаць наведваць школу. Працяглая адсутнасць на занятках без значных прычын можа прывесці да сур'ёзных наступстваў, ад штрафу да абмежавання бацькоўскіх правоў.
Крок 2. Выбар школы
У большасці выпадкаў дзіця залічаюць у найбліжэйшую да хаты школу. Некаторыя акалічнасці могуць перашкодзіць гэтаму, напрыклад вялікая запоўненасць класаў, адсутнасць інтэграцыйнай праграмы і да т.п. Таксама бацькі самі могуць пажадаць выбраць іншую навучальную ўстанову, да прыкладу прыватную, альбо з роднай мовай навучання, альбо ў якой вучыцца іншае іх дзіця. У некаторых краінах пры гэтым абмяжоўваецца час, які школьнік будзе затрачваць на дарогу.
На выбар таксама можа паўплываць наяўнасць груп падоўжанага дня і дадатковых заняткаў (у тым ліку па мове краіны побыту).
У шмат якіх краінах існуюць школы, што навучаюць па праграме Мантэсоры. Гэта канцэпцыя грунтуецца на самавызначэнні і самастойнасці дзіцяці, уліку яго персанальных інтарэсаў і жыццёвага рытму.
Цягам навучальнага года магчыма правядзенне дзён адчыненых дзвярэй. Можна наведаць некалькі школ і азнаёміцца з навучальным працэсам, умовамі знаходжання і да т.п.
Крок 3. Сабраць дакументы
Спіс дакументаў, вядома, залежыць ад краіны побыту. Да таго ж ён можа адрознівацца і ў розных навучальных установах. Але напэўна спатрэбяцца наступныя дакументы:
пасведчанні асобы бацькоў і дзіцяці (пашпарты з візамі, пасведчанне на права жыхарстваі да т.п.);
медыцынская даведка пра стан здароўя (вынікі медыцынскага ці псіхалагічнага агляду);
звесткі пра сканчэнне пэўнага класа ў школе на радзіме, атэстат пачатковай ці сярэдняй школы (калі іх няма, вучняў аддаюць у адпаведны клас на падставе сумоўя);
пацверджанне ўзроўню валодання мовай.
Крок 4. Падаць заяву
У большасці выпадкаў заява падаецца наўпрост у школу. У некаторых краінах і нават асобных гарадах (напрыклад, у Вільнюсе і Тбілісі) ёсць цэнтралізаваныя электронныя сістэмы.
Калі вы не знайшлі неабходную інфармацыю, звярніцеся ў тую навучальную ўстанову, якую вы абралі, – там вам дадуць неабходныя звесткі.
Шаг 5. Падпісаць дамову аб навучанні
Досыць распаўсюджаная практыка – афармленне дамовы аб навучанні. У ёй фіксуюцца ўсе нюансы, што маюць значэнне для сям'і і навучальнай установы, напрыклад пра магчымасць дадатковага вывучэння дзіцём мовы, атрыманні дапамогі ў навучанні, удзеле ў пазакласнай дзейнасці і інш.
Крок 6. Прайсці медагляд
Пра працэдуру атрымання даведкі аб стане здароўя таксама лепш даведацца ў школе. Рэч у тым, што ў некаторых краінах патрабуецца накіраванне на медагляд. Яго можа даваць як і сама навучальная ўстанова, гэтак і муніцыпальная служба аховы здароўя.
Крок 7. Плата
Дзяржаўная сярэдняя адукацыя ва ўсіх еўрапейскіх краінах бясплатная. Бацькі аплачваюць толькі харчаванне, экскурсіі, гурткі і да т.п.
Для аплаты прыватных навучальных установаў у шмат якіх краінах даецца сацыяльная дапамога, асабліва калі няма магчымасці паступіць у звычайную школу. Таксама ўлічваюцца даход сям'і, колькасць дзяцей і г.д.
Пры навучанні ў школах, што належаць рэлігійным канфесіям, частку платы можа ўзяць на сябе суполка, і кошт там будзе ніжэй.
Крок 8. Аплата праязнога
Паколькі транспарт у Еўропе дарагі, не варта выпускаць з-пад увагі і гэтае пытанне.
Калі не атрымалася ўладкавацца ў школу, да якой мажліва дабрацца пешкі, то на аплату дарогі можна атрымаць субсідыю (льготны праязны, зварот грошай і г.д.). У шмат якіх еўрапейскіх гарадах праезд для школьніц(каў) зусім дармовы.
Чытайце таксама:
- Як знайці адпаведную школу ў Літве, Польшчы, Нямеччыне ды Грузіі?
- Як уладкавць дзяцей у садок ў новай краіне побыту?
- Перасячэнне мяжы з непаўналетнім дзіцём. Якія патрэбны дакументы і хто павінен суправаджаць?
Інфармацыя на сайце сабрана з адкрытых крыніц. Калі вы знайшлі памылку ці даведаліся, што інфармацыя больш не актуальная - паведамце нам, калі ласка, праз наш чат.